Xoves, Maio 30, 2024
ActualidadeXornada

GHARABOTO REAFIRMA O SEU LIDERADO EN POIO. XAN RODIÑO GANA A XORNADA. BEGO PRIMEIRA EN FEMININA. RAIO VERDE PRIMEIRO EN INFANTIL

En Poio todo parecía preparado para que a Armadiña reconquistase a praza de podio que perdera na xornada pasada, mais a enerxía cósmica, o universo, os astros ou quen sexa que lanza os dados da fortuna, non se acordou do equipo de Combarro. Incluso, nas últimas horas do venres o equipo celeste confirmou a incorporación de Papi, Gael, André e Martín Castro, estes tres últimos xogadores en idade infantil, para reforzar a súa armadura competitiva. A fichaxe de Papi é unha aposta estratéxica, pois esta temporada o equipo armadiño quere, desexa e anhela unha das tres primeiras prazas que lle dea acceso ás finais galegas. A actuación de Papi foi excelente, así como foron boas as de Manu e Peque, mais Cho (o ata agora número un do equipo volveu a encontrar dificultades no seu golpeo) e Diego non estiveron a bo nivel, cousa que lastrou a puntuación final do equipo.

Gharaboto de Marín ganou en equipos, segundo foi Lúa de Forza Sanxenxo e terceiro Corredoiras de Bueu. Os tres grandes das Rías Baixas volven a impoñer o seu poderío.

En escuadras femininas ganou Gharaboto, seguido de Valpaços Terra Quente de Vigo e de Corredoiras.

En infantil, O Raio Verde, Xián, de Lúa de Forza Sanxenxo foi primeiro, segunda foi Antía e terceiro Hugo, de Gharaboto os dous.

En categoría Feminina ganou Bego de Corredoiras, segunda foi a infantil Lucía de Valpaços Terra Quente de Vigo, e terceira María Caride de Gharaboto.

A xornada ganouna Xan Rodiño de Lúa de Forza, segundo foi Álvaro de Gharaboto e terceiro Chicho de Lúa de Forza.

O campo de herba sintética da Reiboa foi exixente e só 7 puntuacións chegaron á decena de ptos. O resto da participación (71) non chegaron aos 10 ptos. O vento nordés sopraba sobre as billardas e facía máis difícil do habitual golpealas no aire. O ceo foi benigno e deixou que o sol brillara para deleite da rapazada. Non obstante, había que abrigarse ben, xa que, o aire do norte non se acercou a Poio para facer amigas, nin amigos. Salientar que reapareceu en Corredoiras Fari, o xogador máis musculoso e con mellor flexión e extensión de brazo no golpeo de todo o Morrazo. O de Bueu achegou 6 ptos para o equipo. Despois, está o caso de Charri, que desde que pasou polo quirófano non pasou da fase de grupos, cousa moi estraña nun palanador das súas condicións. Acaso, a cirurxía que reparou as súas avarías foi máis alá do seu obxectivo e afectou a algún órgano esencial? Será que a raíz de que Risto Mejide lle dixo, “para mí es un No, Charri“, o de Beluso entrou en pánico e perdeu a fe nas súas capacidades? En   definitiva, Charri, amigo, recupérate canto antes… ou, como ti vexas!

Non debemos nin queremos esquecer que o Ciclón de Moscoso volveu sacar o seu poderoso corno e mandou a billarda dun só golpe ata detrás da liña do varal. Si, fixo un Varado, e xa van dous en total, cousa que lle permite encabezar a clasificación xeral desta especialidade.

Sumados os ptos da xornada a clasificación xeral queda encabezada por Piru, quen atravesa un oasis de resultados, segundo é Che que mantén a boa xeira e semella esquecida a súa irregularidade doutras temporadas. Adri mantense ao axexo do liderado e continúa acumulando boas puntuacións. Co liderado de Piru, xa van 5 líderes diferentes nas 6 xornadas de liga, cousa nunca antes vista. Xan con 50 ptos gana posicións e acércase á zona de podio. Daniel que partía a xornada com colíder tivo unha actuación moi discreta e agora está quinto cos mesmos 50 ptos que o cuarto. Hai que dicir que o de Gondar xogou cunha lesión de ombro que o limitou demasiado. O trío de Armadiña, Manu, Peque e Cho seguen e conseguen estar a un paso do podio da xeral. Os dous primeiros están mostrando unha regularidade sorprendente e podemos afirmar que esta vez si hai que contar con eles para o título. Cho, xogador de talento descomunal, nas dúas últimas xornadas mostrou o seu perfil máis irregular, cousa que sabemos non o vai desanimar. Álvaro deu un paso de xigante co seu segundo posto e xa se mete na zona Dez. Ricar xa recuperou o seu golpeo seguro e firme e a pesar de faltar a unha xornada xa entra na zona Dez a 14 ptos do primeiro posto. Xa hai que contar con el para o título.

PIRUGHA59
CHERIN58
ADRI PASTOCOR55
XANLÚA50
DANIELRIN50
MANUARM48
PEQUEARM48
ÁLVAROGHA46
CHOARM46
RICAR COR44
CHICHOLÚA39
XIÁN INFLÚA39
BENICOR38
BEGOCOR37
HUGO INFGHA33
GELÍNGHA32
LUÍS CAMIÑAGHA30
RICARDO LOISGHA30
MARTÍNLÚA30
RICOYLÚA29
CAROLOLÚA29
CRISRIN29
ADRIANAVAL28
CHARRICOR25
YAIZAVAL24

Para ver as demais clasificacións picar enriba de clasificacións.

FOTOS

VINDEIRA XORNADA SALCEDO, PONTEVEDRA, 11 DECEMBRO

Deixa unha resposta

O teu enderezo electrónico non se publicará Os campos obrigatorios están marcados con *