Martes, Marzo 19, 2024

LIGA ATLÁNTICA DE BILLARDA

Liga Nacional de Billarda

Esta aventura marabillosa chamada LNB ten a súa orixe na Mariña de Lugo e na mente dun grupo de persoas que devecían por recuperar a práctica da billarda. Esta actividade física, lúdica, cultural e deportiva tivo tamaño arraigo en Galicia que a converteu nun dos xogos máis populares, coñecidos e practicados durante séculos. A comezos do século XXI, a billarda non se practicaba e só en festividades ou acontecementos sinalados podíase ver voar este artefacto de madeira. Pois ben, no 2003 comezou a recuperación coa celebración dos primeiros Torneos Abertos de Billarda na Mariña. Pasados dous anos, no 2005, constituíuse a ACD O Varal para dar soporte xurídico a aquela fantástica idea de crear a LNB como ferramenta e estrutura para fomentar e favorecer a práctica deste deporte tradicional. A día de hoxe, podemos confirmar que a LNB está cumprindo a obxectivo que aqueles pioneiros e pioneiras da Mariña luguesa imaxinaron, a de normalizar a practica da billarda entre todas as galegas e todos os galegos de calquera idade e condición. A modalidade de billarda da LNB practícase en todas as provincias galegas e a visibilidade que esta liga lle deu sacou a billarda da memoria dos nosos antepasados para levala de novo ás zonas de ocio e recreo do noso país.

A LNB está organizada en 3 Conferencias: NorlesteNoroeste e Rías Baixas. Cada Conferencia disputa un numero de xornadas anuais. É unha liga Aberta, calquera pode incorporarse en calquera momento da temporada. Ao final da temporada celébrase a FinaLNB. Participan nesta final aquelas persoas que se clasificaron pola súa Conferencia respectiva.