APB afiou o CO…i…TELO en Caión
APB gana en Caión e a prensa apenas se fai eco de tal proeza. Unha simple frase, “por equipos a vitoria correspondeu a Santa Marta“, e unha frase que usa o antigo nome do equipo. Acaso os medios de comunicación da Comarca de Bergantiños só teñen frases subordinadas e adxectivos cualificativos cando gana o equipo de Paiosaco, de cuxo nome non queremos acordarnos.
“Boto de menos o verbo florido, os cualificativos épicos e as expresións axeitadas para a heroicidade de APB”, dicía o fundador do equipo Julio V. Tamén, Roi R. cuestionaba a liña editorial dos xornais, “será que custa dicir que un equipo da Laracha ganoulle ao de Paiosaco?”. O xogador franquicia de APB, tamén incidiu na insistencia dos medios en seguir usando un nome que non corresponden á nova etapa laica e antisistema do equipo larachense, “non nos libramos de Santa Marta nin quitándoa do nome do equipo”.
Para que quede constancia que BIGAL, o único medio deportivo neutral, nihilista e bioeticoecolóxico do panorama mundial, non se deixa manipular como monicreque, polo poder de influencia de EGASA aquí deixamos estas frases cargadas de… APB ganou a súa segunda xornada histórica desde que é equipo de billarda, nunha Conferencia onde o dominio é cuasiabsoluto dun dos equipos históricos da LNB, como é Campo da Feira.
APB avanzou cara á súa subsistencia coa incorporación da excelente semente de palanador@s de Trasancos. Desta maneira, esta temporada, manexa 11 xogador@s. Veremos se serán suficientes para acadar o seu obxectivo, a segunda posición.
A pesar desta destacada vitoria de APB, non podemos nin queremos esquecer certos acontecementos que sucederon en Caión. A maioría deles cun único protagonista. Pero non imos desvelar nada, xa que queda todo moi claro no audiovisual da xornada.
