Esta realidade de liga deportiva chamada LGB, Liga Galega de Billarda, naceu dunha semente, dunha aventura marabillosa chamada LNB que naceu na Mariña de Lugo e na mente dun grupo de persoas que devecían por recuperar a práctica da billarda. Esta actividade física, lúdica, cultural e deportiva tivo tamaño arraigo en Galicia que a converteu nun dos xogos máis populares, coñecidos e practicados durante séculos. A comezos do século XXI, a billarda non se practicaba e só en festividades ou acontecementos sinalados podíase ver voar este artefacto de madeira. Pois ben, no 2003 comezou a recuperación coa celebración dos primeiros Torneos Abertos de Billarda na Mariña. Pasados dous anos, no 2005, constituíuse a ACD O Varal para dar soporte xurídico a aquela fantástica idea de crear a LNB como ferramenta e estrutura para fomentar e favorecer a práctica deste deporte tradicional. A día de hoxe, podemos confirmar que a LNB cumpriu a obxectivo que aqueles pioneiros e pioneiras da Mariña luguesa imaxinaron, a de normalizar a practica da billarda entre todas as galegas e todos os galegos de calquera idade e condición. A modalidade de billarda da LNB practícase en todas as provincias galegas e a visibilidade que esta liga lle deu sacou a billarda da memoria dos nosos antepasados para levala de novo ás zonas de ocio e recreo do noso país.

No ano 2020 o Parlamento Galego recoñece a Billarda como modalidade deportiva. A comezos do 2021 nace a Federación Galega de Deporte Autóctono. Nesta Federación están incluídas a modalidade deportiva de Billarda e a de Chave.