En Narón, Aroa faise coa vitoria nas categorías Infantil e Feminina. Xan gana na Absoluta. Campo da Feira vence en Equipos.

O paseo marítimo de Narón, na beira norte do río Xuvia, foi o escenario da penúltima xornada da Liga Atlántica de Billarda na Conferencia Noroeste. Unha mañá espléndida e unha zona verde marabillosa para gozar da práctica deportiva da Billarda. David Corral e os seus compañeiros de Filloas de Sangue levaban preparando esta xornada moito tempo e a boa fe que conseguiron que todo saíra ben ou mellor que ben. O Concello de Narón colaborou coa Federación Galega DEPAU Modalidade Billarda cedendo e acondicionando as instalacións do paseo marítimo, así como, achegando os premios para toda persoa participante na xornada. Asistiu á entrega de trofeos, José Oreona, concelleiro de Deportes. Tamén, sabemos que o concello vai facer o posible para que haxa un campo de billarda en Narón. Cousa que sería moi positiva para o noso deporte, pois a creación de infraestrutura para a práctica da billarda é fundamental para que calquera persoa poida probar a diversión e o entretemento que proporciona este deporte marabilloso chamado billarda.

Volveron a participar 2 equipos da provincia de Lugo e 1 da de Pontevedra, ademais dos 4 equipos da Coruña. Foron 49 persoas, das cales, 8 mulleres e 3 infantís. Esta temporada a participación do Noroeste aumentou moito e a falta dunha xornada por disputarse a participación media está en 46,75 (contando con participantes das Rías Baixas). Isto fai que a día de hoxe e faltando por contabilizar a participación das últimas xornadas das dúas conferencias as prazas de finalistas estean deste xeito (aquí xa só se contabiliza a participación de xente do Noroeste).

Entón, na Categoría Absoluta serían, por 11 décimas, 15 prazas para o NOR e 17 para as RIB. Ollo que falta a participación nas últimas xornadas por contar. Na Categoría Feminina, serían 4 prazas para NOR e 12 prazas para RIB. Aquí, tamén está por decidir esa praza que de momento corresponde ás RIB, por 7 centésimas. En fin, magnífica nova a do aumento vertixinoso da participación no NOR.

Xan Rodiño de Lúa de Forza Sanxenxo ganou a xornada, seguido de Juancar e terceiro foi Charli, estes dous xogadores de Campo da Feira Paiosaco. Aroa ganou en feminina, segunda foi Geni, as dúas de Billardeiros Musicais Ribadeo, e terceira foi Merche de APB A Laracha. En Infantil primeira foi Aroa, segundo Xan González e Ramón González, os dous de Filloas de Sangue A Coruña. En equipos foi primeiro Campo da Feira de Paiosaco, segundo APB da Laracha e terceiro Billardeiros Musicais de Ribadeo.

Despois de sumar os ptos da xornada, as clasificacións xerais quedan dispostas para a última xornada. Moitas interrogantes quedan por decidir…

Será quen Collazo de facer unha fazaña épica e discutirlle o título de Conferencia a Xan?

Quen subirá ao terceiro chanzo do podio final da Categoría Absoluta?

Quen se levará o título Individual Feminino? Quen ocupará as prazas de podio?

Para concluír, quen ocupará as últimas prazas de finalista?

Ademais da emoción que supón haber moi pouco deferencia de puntos entre os candidatos, engádese a dificultade da superficie de xogo. Un terreo agreste que haberá que acondicionar e que vai provocar puntuacións moi baixas a ben seguro. Polo tanto, quen teña unha xornada boa pode sacar bastantes puntos de vantaxe sobre os seus rivais, se estes non teñen o día. Daquela, todo está no aire e … nos terróns do campo de Santa Marta.

Outra cousa a destacar foi a presenza dun xuíz de campo coa nova indumentaria que se vai usar na Final da Liga Atlántica de Billarda. Vemos a Berdi lucindo tan meritoria roupa. Ten dúas funcións primordiais segundo nos contou o de Cochiqueiros, por unha beira, busca que o xuíz sexa identificado con facilidade e por outra beira, quere intimidar a aquelas persoas moi dadas a manifestar o seu descontento por non golpear ben, coa persoa que o único que fai é impartir xustiza. Cremos, que unha vez máis, o NOR acertou con esta iniciativa tan, tan… axeitada.

Aquí quedan fotos espectaculares da billarda en Narón.

Desta vez, temos excelentes vídeos para deleitar a vista de analistas e expertos do mundo da biomecánica deportiva. Sabemos que é difícil comprender como se pode golpear con tanto garbo e elegancia un pau que voa dando voltas sobre o seu eixe central, mais uns segundo de fotogramas a unha velocidade axeitada pode darnos pistas sobre esta habilidade extraordinaria que teñen algúns seres vivos que habitan a Galaecia. Vaia, e despois está a billarda rítmica e artística que só é quen de realizar, polo momento, o Landras. Hoxe temos o privilexio de ofrecer o audiovisual pioneiro dunha nova posición de golpeo chamada a posición felina.