Houbo LÚA DE FORZA no ceo de SANXENXO. Regresou Piru e os seus Piruchazos para un triunfo incontestable. Tania recupera o liderado en mulleres. Abel Ponte superou ao Raio Verde Xián.

O CABINA, como se coñece popularmente ao Campo de Billarda de Nantes, acolleu onte a 56 persoas, as cales disputaron a xornada 7 da Liga Atlántica de Billarda Conferencia Rías Baixas. A tarde presentouse con boa temperatura e con nubes altas que foron moi agradables, pois evitaron a excesiva insolación de toda persoa humana que se moveu sobre o terreo de xogo. 6 equipos da provincia de Pontevedra e 1 equipo de Paiosaco puxeron todo da súa parte para que as billardas voasen camiño do varal. Este empeño non sempre foi ben considerado e moitas billardas non entraron no varal e insistiron en resistirse a tal proeza. Puntuacións bastante baixas en xeral. Só 4 palanadores pasaron de 20 ptos. Catastróficas actuacións e perturbadores golpes que confirmaron o alto nivel de dificultade do CABINA. Mención especial ao noutra hora líder da competición, Charri, quen non levanta cabeza e por segunda xornada consecutiva acada tan só 13 ptos. Cousas de ter tanta fama e éxito mediático. As chamadas telefónicas para contratar os seus monólogos comico-deportivos teñen ao mexicano que mellor pronuncia SANXENXO nun “non durmir”. Houbo un cambio de líder, pois Daniel cedeulle o posto a Xan Rodiño, o poeta melancólico de Dorrón. Coméntase no mundo da billarda que toda aquela persoa que le o poemario do Rodiño, Poesicatrices, cae nun estado de hiperconsciencia e xa nunca máis dá un bo golpe de palán. Dous exemplos prácticos deste embruxo literario son Daniel e Che, que leron os versos endecasílabos de rima asoante e … vaia, non chegaron a 10 ptos.

Ganou a xornada Piru de Gharaboto, segundo foi Juancar de Campo da Feira e terceiro Fari de Corredoiras. En categoría Feminina foi primeira Tania, segunda Adriana, as dúas de Valpaços Terra Quente de Vigo e terceira LU de Lúa de Forza. En categoría Infantil ganou Abel de Campo da Feira, segundo foi o Raio Verde, Xián de Lúa de Forza e terceira Antía de Gharaboto. Por equipos o triunfador foi Lúa de Forza de Sanxenxo, segundo foi Campo da Feira de Paiosaco e terceiro Gharaboto de Marín.

A tarde presentábase propicia para o equipo local Lúa de Forza, posto que o seu gran rival Corredoiras Bueu só puido presentar a 5 xogadores. Tamén é certo que o equipo do NOROESTE Campo da Feira presentouse en Sanxenxo cunha aliñación de gala. Este equipo acudiu á xornada coa intención de que lle servise de preparación para a Fase Final que terá lugar o 1 de agosto neste mesmo escenario do CABINA, pois, xa teñen o posto garantido na categoría de equipos por ser campións virtuais da súa Conferencia. De todos os xeitos, tamén se lles pasou pola cabeza a posibilidade de ganar a xornada e ben que o tiveron cerca. Non obstante, o sábado foi Lúa de Forza Sanxenxo quen cegou a todos os equipos co seu brillo, mesmo o luar atravesou as nubes da tarde do Salnés. O regreso á titularidade de Juanchi, o roqueiro da Ponte, despois de superar unha lesión de ombro, supuxo a maior puntuación do equipo verde nesta temporada, 86 ptos. Corredoiras Bueu bastante fixo con perder só 29 ptos con relación ao equipo líder da competición. Gharaboto mantén o pulso e o terceiro posto do podio. Rinoceronte tivo unha mala tarde, pois os seus primeiros paláns non pasaron de 10 ptos e cando Daniel e Che non funcionan o equipo do corno non sae da poza de lama onde lle gusta fozar e bañarse. Valpaços conseguiu a súa mellor puntuación e mantén a quinta posición da xeral. Laxe tivo bastantes baixas e a pesar de que Martín e Gerardo tiveron boas puntuacións non puideron ser máis que último equipo da tarde.

As prazas para participar na Fase Final do 1 de agosto están deste xeito a falta de 3 xornadas, Salcedo, Marín e Bueu.

CATEGORÍA ABSOLUTA

CATEGORÍA FEMININA

CATEGORÍA EQUIPOS