Xa chega outra fin de semana de emocións e de paus. A Conferencia Rías Baixas inicia a conta atrás para saber quen se alzará co título de Conferencia e quen conseguirá praza para a fase final, que este ano se disputará no CABI de Nantes (Sanxenxo) o día 1 de agosto. Faltan 4 xornadas e as altas temperaturas desta época van aumentar a transpiración dos corpos atléticos e non tan atléticos de deportistas e de espectadores. O CABI (Campo de Billarda) de Nantes é un verdadeiro calvario no cal, levantar a billarda de maneira axeitada para o posterior golpeo, é labor complicado, cando non imposible.

Aquí aparece a Clasificación Xeral Absoluta nos seus 30 primeiros postos. Os nomes con fondo azul celeste son das prazas que dan dereito a participar na Fase Final que se disputará en Sanxenxo o 1 de agosto. Faltan 4 xornadas e hai que apurar a facer puntos.

Clasificación Xeral Feminina

Clasificación Xeral Infantil

Clasificación Equipos

CONFERENCIA NOROESTE

No norte vaise xogar por vez primeira nas Somozas, concello da Comarca de Ferrol.

O Concello das Somozas anuncia na súa paxina web este evento de proporcións exaxeradamente descomunais. Esta xornada quere ser un antes e un despois para a billarda na Comarca de Ferrol e, por efecto dominó, na de Ortegal, na de Eume e na de Betanzos.

Outra cousa ben diferente será o estado do terreo de xogo. Para mostra estas imaxes que captou o noso reporteiro infiltrado. Vaia, superficie de xogo variada. Zonas de pedra miúda, grava, couces de salgueiro e herba con musgo. Sen esquecer o cableado eléctrico a uns 7 metros de altura que cruza o campo.

Non hai que ser alarmistas, nin negacionistas ou… si, alá cada quen. O noso infiltrado anónimo é optimista crónico e confirma con absoluta rotundidade que vai ser a xornada mellor organizada e con máis alto voltaxe da Liga Atlántica de Billarda.

Queremos incidir unha vez máis no poder dos medios de comunicación para divulgar calquera actividade deportiva e na nosa responsabilidade de ofrecerlles información e de mover esta información da billarda nas nosas redes sociais. Un exemplo claro do magnífico labor de EGASA e o seu equipo de comunicación é a repercusión que ten a Conferencia Noroeste nos medios. Grande EGASA. “Compartide nas vosas redes sociais compañeir@s“, di sempre con voz clara e segura, Edu, o “Grande Egasa”. Que razón ten e que pouco caso lle facemos!

Noticias de Bergantiños publicou o 21 de xuño, no seu facebook, a información que subiu o concello de Laxe xunto con imaxes da entrega de premios da xornada 8 da Conferencia Noroeste da Liga Atlántica de Bilalrda. Bisbarra en xogo tamén publicou ese mesmo día 21 unha crónica e imaxes da xornada de Laxe. Que pasa na costa publicou o 17 unha previa da xornada de Laxe e o 22 comentou o sucedido no pavillón de Laxe. Ademais da edición en papel do Diario de Bergantiños.

E Nòs diario tamén informou hoxe das xornadas da vindeira fin de semana.