A xornada 4ª da Liga Atlántica de Billarda, Conferencia Noroeste, disputouse en Ponteceso, nas inmediacións do MELGA, Museo Etnolúdico de Galicia. As 46 persoas participantes, a maior parte delas seres humanos, gozaron do sol, do aire, da herba e … incluso algúns palanadores tiveron tempo de tomar o café entre carreira e carreira. Iso si, algún perdeuse no traxecto cara ao bar máis próximo e tamén perdeu a súa vez de golpeo. Ricardo Pérez y Verdes foi o anfitrión de tamaño evento deportivo. O director do MELGA tivo a ben abrir en domingo as instalacións para albergar a entrega de premios e o sentido e merecido homenaxe que a Federación Galega DEPAU, modalidade de Billarda, Conferencia Noroeste lle deu a Jesús Andrade, palanador de Filloas de Sangue, natural de Ponteceso e que tivo que deixar de xogar por un problema de saúde.

Os equipos presentaron estas aliñacións: APB puxo a defender a Merche, Riveiro e Vilas, e deixou a Cotelo, Lito, Bieito e Iván máis adiantados para apañar os ptos que manteñen ao equipo da Laracha na segunda posición. A hemorráxica non nota en exceso a ausencia do seu número 1 Roi Rey. Incluso se escoita comentar que o talentoso e metódico palanador está en folga de paláns por unha discusión subida de adxectivación indecorosa que tivo con Cotelo, palanador que está moi medrado. Despois do alto rendemento da temporada pasada, o infatigable normalizador da Laracha quere ser o número 1 do equipo hemorráxico. As últimas palabras que se escoitaron nesa discusión foron “vaite tomar… café, Cotelo”. FEI puxo a xogar atrás a Mercedes, Auri, Fontaíña, Óscar Ponte, Fuentes, Charli, Lucas, Isa e Juan Carlos, e para atacar os ptos puxo a Eladio, Enrique, Marc, Xulio, Abel e Collazo. O equipo multicampión xa ve outro novo título cerca e, así, algunha das súas estrelas tómase a licenza de faltar a algunha quenda de golpeo. Van tan sobrados que incluso aforran golpes en algunha carreira. Seica é recomendable para que a musculatura non sufra tanto. Óscar é un dos seguidores desa nova liña de adestramento personalizado. FIL sacou un equipo claramente defensivo, con Ramón, Lino, Corral, Landras, Xan G. Dopico, Jesús Insua, José Moris, Miranda, Miklós e Gándara, e puxo a Roi Moris e a L. Fontán como únicos atacantes. Non lle saiu de todo ben a estratexia, xa que dous defensas tiveron que contribuír cos seus ptos para que o equipo mantivera esa terceira praza da xeral. De todos os xeitos, felicitar ao equipo da Coruña, pois ninguén pode dubidar que é o equipo que maior esforzo orzamentario fixo para reforzarse esta temporada. E ben que se nota na clasificación. Iso si, deben traballar arreo na recuperación anímica de Landras. COQ contou na parte de atrás con Boquete, Alberte, Sonia e Silvia e meteu o seu tridente ofensivo para acadar os ptos da xornada a Berdi, Abel Regueiro e Viqueira. Magnífica planificación de cadro de xogadores para esta temporada no equipo de Cerceda. Atrás quedan aquelas xornadas nas que, os dous prófugos da xustiza Berdi e Viqueira, tiñan que ser traídos ata o terreo de xogo esposados polo Cherif Lito Pena. Pola súa beira, LÚA chegou cunha única defensa, Marisa e con Carolo e Xan Rodiño en punta, para atacar eses desexados ptos. Houbo a participación dun nativo de Ponteceso, Ito, quen non foi capaz de aguantar o esforzo dunha xornada, a do MELGA, sempre exixente coa resistencia anaeróbica dos participantes, pois o terreo de xogo consiste nunha mestura de cemento, nos primeiros 15 metros e de herba e buracos estratexicamente situados para dificultar as evolucións das billardas. En definitiva, os músculos e tendóns deben resistir a montaña rusa do campo do MELGA. Ademais, as sempre temidas e respectadas silveiras de detrás dos varais, infunden precaución, cando non sufocación e afogo, ao golpear preto da entrada do varal.

Salientar a presenza dun novo xogador en COQ, mellor dito, a recuperación dun xogador histórico da franquicia cercedense, o sempre pausado e renovador Boquete, ideólogo da neveira con rodas que presentou o equipo de Cerceda nunha FinaLNB e que revolucionou o deseño de complementos deportivos. Tamén, FEI fichou a unha palanadora para reforzar a súa sección feminina, pois o equipo de Paiosaco é tan dominador na súa categoría que busca novos horizontes. Si, agora ten o obxectivo de poñerse á altura das grandes escadras femininas da Conferencia Rías Baixas, para nun futuro moi cercano disputar o título nesa prometida e devezada Categoría de Equipos Femininos que non existe aínda na Conferencia Noroeste.

Collazo ganou a xornada e sitúase novo líder, despois de que Charli non tivera unha boa actuación, quedándose en 9 ptos. O de Gabenlle conseguiu 24 ptos e escalou ata o máis alto da xeral. Segundo foi Xan Rodiño e terceiro Viqueira. En féminas, ganou Marisa por diante de Merche. En Infantil, ganou Abel, seguido de Lucas e Xan G. Dopico.

ACTAS

CLASIFICACIÓNS

FOTOS DA XORNADA