RESACA DA EMPANADA DE NÉCORAS
A xornada disputada en Eirís tivo como principal protagonista a empanada de nécoras que chegou das Rías Baixas para conquistar os estómagos… e a vitoria. Como actor secundario estivo o novo logotipo de APB, que aínda non encontrou o seu lugar na equipación do equipo de Trasancos. Como actriz de reparto citamos a Santa Marta, quen está a piques de abandonar a billarda… por problemas de axenda.
Imos por partes, primeiro sinalar que Abel Ponte non fai prisioneiros nin entre os seus compañeiros de equipo. Así, o campión LNB Infantil mandou unha billarda teledirixida e o bo de Lucas parouna coa pucha e co cranio.
A participación infantil foi magnífica e Anxo Añón, con 5 anos, xa mostra o talento do seu proxenitor. Migui continúa coa súa progresión e semella estar ao nivel de Abel Ponte, tanto é así que encabeza a xeral Infantil.
Tamén, fíxoselle unha foto como recoñecemento aos catro xogadores da Conferencia que son centenarios. Lois Fontán encabeza este cuarteto de comprometidos palanadores grazas aos cales continúa viva a práctica da billarda na provincia. Grazas compañeiros e mil primaveras máis para a billarda… e para vós, a alegría de quen se puxo a xogar e encontrou amig@s.
Aquí queda o audiovisual homenaxe a o equipo de Trasancos que inicia un novo camiño, esta vez laico, para chegar a Compostela.
