9ª xornada NORLESTE Mondoñedo “AUUUUVARIÑO”

      O internacional Isma, quen está fóra debido a que faltou unha xornada e agora bota en falta eses puntos que non sumou. Non obstante, o internacional de Ponte de Outeiro está facendo certas xestións para conseguir 2 prazas de convidado para a Final Nacional 2018. O seu argumento é moi sólido. Afirma que non se entendería que os dous internacionais da Conferencia Norleste non disputasen a Coroza 2018, tendo en conta que os outros dous internacionais LNB, que pertencen á Conferencia Rías Baixas, están tendo un trato de favor por parte do resto dos competidores. Estes dous xogadores das Rías Baixas practicamente teñen asegurada a súa participación na Final Nacional a estas alturas de temporada.

FLORES Seleccionador LNB

         Os casos de Isma e Iván Alonso, dous palanadores que defenderon as cores galegas no Torneo Internacional de Pandolo (Slovenija, 2017, xullo), están sendo estudados por estamentos internacionais da Billarda-Pandolo-Lipa-Zturca. “Non pode ser que na conferencia Rías Baixas traten con honores aos seus internacionais e aquí teñamos tan pouca memoria cos nos heroes”, afirmaba Flores (Seleccionador LNB). Certo é que os internacionais das Rías Baixas están practicamente clasificados para a Final Nacional 2018 e iso que faltan 7 xornadas. A indignación do Seleccionador Nacional está motivada e fundamentada na lei universal da reciprocidade, se ti me ofreces algo eu terei que corresponder dándoche algo. “Os bravos palanadores da Norleste precisan que os seus esforzos pasados sexan recoñecidos agora. Isma e Iván deben participar na Final Nacional ou a LNB non tería sentimentos, e se non ten sentimentos, eu non sei que fago aquí”. Así remataba Flores a súas manifestacións. Interpretando as súas sentidas palabras entendemos que poñería o seu cargo a disposición da LNB se non se fai algo para que os internacionais estean en Compostela a finais de maio.