6ª XORNADA CONFERENCIA NOROESTE

PARTICIPACIÓN

28

3 MULLERES

25 HOMES

RESULTADOS

Chegounos a crónica do noso corresponsanl “XR menos sete”, enviado a Paiosaco para ser testemuña do gran traballo de fomento e divulgación que están facendo os nosos compañeiros e irmáns da Conferencia Noroeste da Billarda no seu formato LNB. 

    “Unha mañá de esplendor solar no terruño de Paiosaco. Algún que outro raposo aínda non sacara a bufanda, pero coa subida do termómetro non tiveron máis remedio que deixar a pel ao descuberto. Ata un total de 28 persoas anotáronse para disputar a 6ª xornada de competición. Salientar que cinco palanadores e unha palanadora xogaron por vez primeira. Era xente de Paiosaco. Tamén, algo extraordinario, e que asegura o futuro da billarda nas terras do Noroeste, foi que dous nenos Martín Calviño e Oscar Cambón debutaron na LNB e prometeron non abandonar. 

   As súas familias están programando xa a viaxe a Compostela o último domingo de maio para medir forzas cos cativos e cativas das Rías Baixas. O xogo estivo condicionado pola presenza de pedregullos entre a terra caliza de Paiosaco. Ademais, os varais orientados ao leste eran obxectivo dos raios do sol e quen non levou pucha, boina ou viseira pasouno mal á hora de golpear. 

   Despois, de dúas horas de xogo os competidores decidiron que na final deberían estar un novel, Juan Carlos que sorprendeu a Collazo nas semifinais, e un Top Dez da LNB, Xan Rodiño. Os pronósticos cumpríronse e Juan Carlos subiuse ao segundo chanzo do podio, sendo a súa cuarta xornada nada máis, mentres Xan ocupou o primeiro posto, quedando terceiro outro Top Dez, Collazo, actual Subcampión Nacional.”

   

XOGADORES/AS LNB

   Despois desta xornada o Noroeste xa aporta 46 xogadores/as á LNB